Skull City y otres histories, Adolfo Camilo Díaz. Ediciones Trabe, 2020
Quiciabes voi dicir dalgo que nun ye nuevo o que yá s’apuntó cuantayá por demás. Y ye que cuando termines de lleer un llibru de rellatos de Dolfo Camilo quedes cola sensación de que podría escribir del xéneru narrativu que-y diere pola gana. Que ta sobráu pa ello, vamos. Y nun fai falta repasar la so obra pa decatase d’esto tan obvio que toi diciendo. Namás que por lleer esti llibru la llectora o’l llector daráse cuenta d’esta cuestión ensin reparar tolo que tien asoleyao como escritor. Skull City y otres histories contién rellatos d’un tiempu p’acá, premiaos y non premiaos, onde con una manera de narrar dinámica construye mundos fantásticos, de la ciencia ficción, de la mina y del erotismu (rellatos estos que nun contienen eufemismos sinón sexu a costafecha como parte fundamental del bienestar humanu. Ensin tabús nin pallabres romántiques) La imaxinación xunto colo onírico y lo surrealista formen una mecigaya resultante qu’ofrez una llectura mui entretenida y orixinal enforma. Recuérdame la lliteratura de Dolfo Camilo a les redacciones que facía un collaciu del colexu (René) y que yeren mundos creaos de la imaxinación particular con seres y llugares que mos tresportaben fuera de la rutina escolar que mos cuntaben los/les maestros/es. Naguábemos por sentir les sos redacciones, yeren rompedores. Como los rellatos de Dolfo Camilo que son como tar mirando un cuadru que nun sabemos mui bien qué quier significar (finales inciertos nesti casu) pero pescanciamos dafechu lo que mos está diciendo a lo llargo del testu. Voi solliñar los rellatos que más me prestaron: “En Sri Nam dicen” (crónica de la esplotación llaboral infantil, alloñada del nuestru mundu real), “Fueya de ruta” (un viaxe al cuerpu d’Angelina Jolie), “King-Kong” (la derrota sexual del machu alfa-babayu), “L’unicorniu azul” (otra versión del clásicu Cenicienta) y “La espedición” (Una aventura espacial que puede arreglar la monotonía nel usu del matrimoniu). El llibru remata con una sinopsis del autor pa caún de los rellatos. Llectura diferente y necesaria pa cola lliteratura asturiana.
Javi Solís