Na sienda’l destín, Nel Morán. Ediciones Trabe, 2020.

Dani Díaz, un rapaz de familia humilde y obrera, entra a trabayar como porteru nuna emisora de radio. Ellí coincide con xente del pasáu universitariu cola que tien cuentes pendientes. La casualidá y l’oportunismu van facer que medre nel escalafón y ocupe un puestu como llocutor de la emisora, espertando les envidies de los compañeros apadrinaos pola dirección de la cadena. Pero trespasar les llindes del “establishment” tien un preciu.

Una novela urbana onde’l nepotismu y l’estatus social rescamplen como los pasaportes fundamentales nos puestos cimeros de los medios de comunicación, siendo la incompetencia manifiesta un factor menor pal ésitu llaboral. La rensía y l’odiu ente los protagonistes marquen el desenllaz de la historia, siendo’l fracasu personal de los adversarios la motivación principal de les sos actuaciones. Esta guerra de desgaste dientro la emisora albídrase como una llucha de clases propia (families de perres y d’abolengu contra xente ensin apadrinar). La novela ta narrada en primer persona pol protagonista y de xemes en cuando apaecen entrevistes de los programes de la emisora p’acercanos d’otra manera a la construcción argumental.

Javi Solís