La xeometría secreta del azar, José Ángel Gayol. Ediciones Trabe, 2021.

Escapar de la derrota ye l’arrancadera d’esta novela que trescurre na ciudá d’Estocolmu. Dempués d’un fracasu lliterariu y ser señaláu polos medios y la crítica, Naldo Asur cola pa Suecia pa dexar atrás esa güelga de vergoña antroxada de mentira relativa. Pero eses mancadures nun curen con llevar una vida rutinaria n’otru llau, la puerta tien de ser pesllada inventándose una personalidá nueva.
Una novela que fala de la posibilidá de fuxir de la vida real al traviés d’un guión qu’asemeye a la lliteratura, a la capacidá d’invención. Como les bones histories, los personaxes nun son controlaos pol escritor y la mentira construyida pol protagonista acaba rescamplando pol azar de les situaciones onde él nun ye quien a llegar. El destín, la vida nuestra, ye un cambiu que se produz de sutrucu. Naldo Asur ye dueñu la situación, pero nun ye quien a controlar los personaxes de la so vida fabricada. El llibru va entemeciendo l’argumentu con reflexones alredor de la realidá de les coses, de conceptos como la mentira, l’azar, el deséu, les motivaciones o esi mieu a nun ser dueños del nuestru futuru, a les decisiones impersonales d’un terceru que mos acerca al desventíu de la inseguridá. L’autor emplega capitulos mui curtios pa nun aturullar al llector y face-y perder el filu de la novela. Tien un aldu de novela negra pero son más unes pingarates pa garrar sabor a una hestoria que tien el traxe d’ensayu, de búsqueda nel interior. Hai un pocu de “gafapastismu” nos personaxes, esi fuera l’aspectu que menos m’enganchó del llibru (entiendo que pa otros y otres llectores sedrá al aviesu, ye un apunte personal) Otra vuelta más esti autor produznos esa sensación d’analizar lo que se mos cuenta rascando nel nuesu “yo”.

Javi Solís