Los homes de bronce, Xandru Fernández. Ediciones Trabe, 2001

Venti años dempués de que ficiera la so llectura (quiciabes aforfugada por aquello de tar estudiando, fartucu munches veces d’apuntes, llibros y clases) garré Los homes de bronce pa descubrir lo que nun foi quién la primer vez. Una novela sobresaliente, con un desendolcu argumental (escurque) como nun tien nenguna otra d’esti xéneru, onde la hestoria cúntase ensin siguir una cronoloxía llinial, sinón unos saltos temporales afilvanaos d’una manera sensacional, eso que tanto mos presta a los llectores (pelo menos a mi), onde los personaxes y la narrativa garren interés y puxu col pasar de los capítulos. Ambientada nes guerres carlistes n’Asturies y nun escenariu visiegu, escuru, el Valle de Poladura, onde llinden los conceyos de Mieres y Ayer, onde tamién L.lena y Llaviana vense reflexaos na obra. Dos families atormentaes vense enfrentaes en griesques personales col escenariu la guerra al empar d’elles. La fuxida, la rensía, el porgüeyu o l’arguyu son quien esmuelen a los personaxes, que van «in crescendo”» col trescurrir de les páxines. Fidalgos, carlistes, cipayos, cures y aldeanos texen la trama acullá de bandos y mandos. El llibru tien un par de maniobres inesperaes, maestres, pa enganchate na llectura ensin atalantar el so desenllaz, un terminar al estilu de la traxedia grecorromana, ensin piedá nin finales heroicos. Ye d’agradecer estes noveles que mos apurren a la historia desconocida n’Asturies, que con poca información de los fechos construyen rellatos que mos tresporten a lo que nun se mos esplicó enxamás (alcuérdome nesti sen d’una obra asemeyada pa con esto, El valor del rei, de Xulio Arbesú).
Estructuralmente perfecta, Los homes de bronce tien d’allugase un sitiu merecíu na novela asturiana, y aprovecho p’afalar a Xandru Fernández pa que torne a escribir nesti xéneru. Esti escritor ye pernecesariu pa siguir calteniendo lliteratura de la bona. Hai una riestra pallabres que nun vienen nin nel DALLA nin nel DGLLA nin nel diccionariu de Sanchez Vicente. Novelón.

Javi Solís