La reserva protexida de Les Cuenques, Ismael María González Arias. Ediciones Trabe, 2021.

Novela curtia centrada en mayor parte nel conceyu Mieres onde los acontecimientos son narraos por una periodista de los Estaos Xuníos que trabaya pa la revista “National Geographic” y qu’aporta p’Asturies col envís de describir la singularidá etnográfica de los habitantes de les cuenques mineres como si una tribu o clan particular fuere. A traviés del so diariu Eleonnor Windstone describe la corrupción y el desaniciu qu’observa col prisma surrealista que-y produz a dalguién que nun ta avezáu al marafundiar de perres públiques y a la trama política-sindical como característica fundamental de la cadarma postminera nos barrios de Les Cuenques (aseméyales bien de veces con Belgráu y otres ciudaes cuasi esbarrumbaes al salir de guerres). L’enfoque que l’autor-y da ye’l de la retranca, pero la retranca que mos produz a nosotros y nosotres nun ye polo que la periodista describe sinón pola confusión y l’ablucamientu que-y causa esa manera tala de comportamientu y etnicidá (grandona por demás) nun escenariu de caos y sobornos a mamplén. Los personaxes políticos y sindicales qu’apaecen son bien identificables y son vistos pola periodista como propios d’otros llugares cimeros de la corrupción. La óptica paranoica descrita por Eleonnor xunto cola perceguera gastronómica qu’amuesa pola nuesa cocina tán presentes en tol rellatu en clave d’humor. Dos coses consigue Mael cola novela: Riínos de nosotros/es mesmos/es (perimportante) y denunciar y aceptar (¡qué triste!) el panorama de desaniciu industrial y caciquismu políticu-sindical n’Asturies d’anguaño.

Javi Solís