La naranxa mecánica, Anthony Burgess (versión asturiana de José Luis Piquero). Ediciones Trabe, 2020.
La novela: Alex y los sos collacios practiquen peles nueches tolo que los instintos más primarios son quien a satisfacer. Una mocedá violenta y cruel nuna sociedá apigazada pol control estatal y la llibertá mazcaritada de prosperidá falsa. La maquinaria represiva del gobiernu ponse a furrular y esperimenta con Alex técniques modernes pa camuda-y el comportamientu conductual y moral. El llibru tien trés partes, con siete capítulos caúna, que tán diferenciaes enforma pa cola historia. Con una narrativa coloquial y gráfica caracterizada pola xíriga “nadsat” l’autor consigue un ritmu áxil y rápidu de los fechos, y el llector nun se pierde en reflexones profundes o interpretaciones argumentales (sí al terminalu). Una novela de puta madre que nunca nun lleera, teniendo como referencia la película de Kubrick que viera hai más de venti años (el llibru presta más). Llectura aconseyable dafechu.
La traducción: hai traducciones al asturianu que cunten con más sonadía nos medios de comunicación escritos (prensa convencional) pero que no sintáctico y no gramatical meten mieu pela cabeza, y dempués ta la calidá granible y el procuru d’esti traductor, de la colección Calume y de la editorial Trabe. Porque lo cenciello igual yera emplegar les pallabres “nadsat” como tán nel orixinal entecominándoles (o aprovechar les d’otres traducciones) y a correr. Pero la traducción tamién torna esta xíriga, de manera qu’eses pallabres lleguen a facer una sonoridá afayadiza pa col asturianu (delles veces esti llector buscaba en diccionariu un términu camentando que yera asturianu y yera “nadsat”. Y al aviesu). Eso yá amuesa un trabayu bien abegosu, xunto coles onomatopeyes tamién tornaes a les voces y soníos propios de la llingua asturiana. Namás felicitar tanto a José Luis Piquero pola traducción como a Rafa Valdés pola dirección de la colección Calume y a la editorial Trabe por apurrir esta novela que, como yá ficieran con “1984”, ta pertrabayada. Afálovos pa siguir sacando títulos nuevos.
Javi Solís