Hestories pa contales (Más nomes de muyer), Paquita Suárez Coalla (coord.) Ediciones Trabe, 2017.

Cuando ún termina de lleer esta retafila de rellatos lo primero qu’atalanta ye la bayura lliteraria del xéneru femenín n’Asturies. Lo segundo, si los llectores paisanos valoramos y atendemos pa lo que mos dicen les nuestres escritores (pienso que bien poco). Nesti llibru atopamos diecisiete hestories onde les protagonistes son les muyeres, como si al empar fueren l’altavoz y la denuncia social, la vindicación y la dueña de lo que mos cuenten. Entama la obra cola escritora más veterana, Carmen Gómez Ojea (“Némesis”) y termina cola más moza, Laura Marcos (“Desvelos”). Pente elles pasen a escena les demás, ordenaes pola edá que tienen. Los rellatos, anque son de toa triba, cuenten con asemeyances como son les hestories personales, les vivencies propies de muyeres “normales” (les heroínes de verdá), les situaciones ausentes pa la sociedá, la visibilización de los pensamientos. Poro, la so propia identidá lliteraria. Como digo, hai hestories onde se traten les rellaciones familiares emburriaes pol destín (Cristina Muñiz, “Triángulu”) o pol mieu silenciáu (Berta Piñán, “Esa puerta”). Otres falen de la tristura ensin eufemismos (Lourdes Álvarez, “Un pesu muertu”) o ensin finales felices (Marta Mori, “La llechera”). Hailes que busquen el reconocimientu y el trabayu de la muyer rural, abondo escaecida pola lliteratura asturiana (Esther García, “La moneda”) o la ilusión de les neñes de los pueblos enxamás contemplada (Pilar Arnaldo, “Carmina”). Atopamos la chancia con tenrura (Aurora García, “A moza d’Agapito”) y la retranca del país (Montserrat Garnacho, “Tolos caminos del orbe”). Rellatos valientes, qu’esnuden lo más personal de les autores (Paquita Suárez, “Pa que sepáis defendevos”) o col ritmu poéticu en vena (Iris Díaz, “Di-y un últimu besu a mio madre”). Y otros de rensía, de coraxe, de cuspir la rabia escontra’l papel (Marisa López, “Xudí”) y d’empatía universal nel circu de la deshumanización (Paula Pulgar, “Asia Box”. El que más me prestó). Namás rematar estes pallabres afalando a estes escritores a siguir garrando una fueya y enllenala d’hestories pa contales y que nosotros y nosotres, los y les llectores d’asturianu, abramos la puerta. Otres más tan picando yá con fuercia (Raquel F. Menéndez, Aida Escudero o Blanca Fernández).

Jai Solís.