El valor del rei

La cuerda d’El valor del rei ta texida con trés filos, que son trés voces: la d’Aurelio, el rei qu’afuxe; la d’Adosinda, una muyer coles idees mui clares y mui medievales; y la de Mauregato, el persiguidor.
Meyor que dicir trés voces será dicir trés pensamientos, dao que tolo que se cuenta nesta novela ta narrao dende l’instante presente de lo que ta pasando, tal como caún d’estos personaxes lo ta viendo y sintiendo.
Hai una espada a los pies del rei y hai un mundu medieval que-y impón la orde de garrala, anque sea pa morrer. Tamién hai un mundu modernu d’homes y muyeres que tovía nun se lliberó d’esa manera d’entender el valor del home.

Xulio Arbesú (L’Entregu, 1957) diose a conocer como novelista yá maduru nel 2001 con Misión Pelayo, obra cola que ganó’l Premiu de Novela Xuvenil de l’Academia de la Llingua Asturiana. Al otru añu féxose col Premiu «Llorienzu Novo Mier» de Creación Lliteraria, convocáu pola mesma institución, con Un raposu en Tresmonte. Narrador de raza, tien algamao’l Premiu «Xosefa Xovellanos» de Novela en trés ocasiones: nel 2002 con Potestas, traducida al castellanu nesti mesmu añu 2017; nel añu 2005 con El pisu d’enriba; y nel 2016 con El valor del rei. Como ensayista orixinal y ocurrente tamién recibió dos veces el Premiu d’Ensayu «Máximo Fuertes Acevedo» con El destín treshumanu (2009) y Los deseos del dineru (2012).