El Sol Negru de Wewelsburg, Xabiero Cayarga. Ediciones Trabe, 2011.

N’Alemaña d’anguaño, inda queden rescoldos del pasáu nazi. Marcial, un mozu emigrante qu’anda al debalu y ensin conformase col futuru probetayu nes empreses de trabayu temporal, conoz a un grupu xente qu’aconceya nel castiellu de Wewelsburg, el que fuera’l cuartel xeneral de les SS. Documentos falsos y prebes enllenes de falcatrúes algamen pa demostrar como’l movimientu sionista ye’l responsable del esbarrumbe social y económicu d’Occidente. Ablucáu pol esoterismu y la mitoloxía nórdica, pola violencia como actu de defensa, Marcial pasa formar parte d’esta refugaya neonazi.

Una novela que reflexa una y bones la manipulación histórica al serviciu de los intereses creaos. “Ye más fácil echar una pelota a rodar que facela frenar”, son pallabres sacaes d’ún de los munchos diálogos que tien el llibru y que despliquen como furrula la maquinaria propagandística. Rescampla lo amañoso de la narración argumentando los postulaos nazis y el discursu incendiariu de los sos siguidores, qu’escargaten nos finxos científicos y nel esplendor alemán p’afitar el destín históricu y poder refugar del presente. Pela cueta, desfái esos mesmos principios cola veracidá y la oxetividá alloñada de prexuicios y escenografía falsa (poro, esi papel de “abogáu del diablu” tan abegosu de consiguir nuna novela, ta claváu).

Esta llectura de Cayarga, como yá me pasara con El cuentu atrás, ye perbayurosa pa col pallabreru, teniendo qu’echar mano del diccionariu davezu (agradezse esi arrequecimientu). Prestaría que l’autor tornara otra vuelta a escribir novela (pémeque ye de lo meyor que tenemos/tendríemos d’esti xéneru), asina que dende equí a ver si soi quien a envizcalu.

Javi Solís