España tien tantes de cuentes pendientes col pasáu que nun ye a desenduviellar el presente nin a acolumbrar el futuru. Esti llibru ye una oportunidá única pa entamar a enfrentar l’ayeri non tan llonxanu y reconocer y homenaxear a aquellos homes y muyeres que, fieles al ideariu republicanu, hubieron d’afuxir del país ya después implicase na resistencia francesa contra los nazis p’acabar cuando nos campos de concentración, cuando lliberando París o morriendo en batalles ensin sonadía pero bien importantes pal devenir d’Europa.
Y a toos ellos y elles pagáron-yos cola traición de les democracies occidentales,  col silenciu más infame y cobarde.

En 42.553. Depués de Buchenwald, Xuan Santori ye quien a dar voz a toes estes persones a través de Vicente García Riestra, republicanu exiliáu, resistente en Francia y deportáu n’Alemaña nazi, y dar a conocer al pueblu asturianu, y español, una parte bien importante de la so historia, qu’entá güei hai quien tien intereses a esgaya en tapecer.