Onde’l caos se texe y se destexe, Xulio Viejo Fernández. Ediciones Trabe, 2021.

Anúncianos Ángeles Carbajal, na reseña de la contraportada, lo que vamos atopar nesta obra de Xulio Viejo. Failo, pémeque, de manera fantástica, creando interés y resumiendo los espacios físicos y sicolóxicos que van ser la cadarma argumental del llibru. Sicasí, tengo que dicir que nun me paez que seya “Onde’l caos se texe y se destexe” una novela, como señala Carbajal. Y nun me lo paez porque m’encartia más como un “ensayu narrativu” o una riestra de rellatos fechos ensin esi orde estructural que camiento tien que tener una novela. Llamóme l’atención, la verdá. Tamién la editorial cataloga’l llibru como novela. Y si Xulio Viejo tamién lo considera d’esta manera (nun lo sé), entós ye esti llector el que nun ta siendo acertáu faciendo la valoración. Pero la sensación que tuvi tres la llectura foi esa, que nun se puede afirmar con rotundidá que ye una novela.

La hestoria trescuerre a mediu camín ente’l conceyu Quirós y los cordales de la redolada, per un llau, y el barriu uvieín de Ventanielles, per otru. Son estos llugares nos que se desendolquen les vivencies del protagonista principal del llibru, el pá del autor. Además, otros familiares y vecinos de Tene, asina como de dellos pueblos quirosanos, aporten al escenariu de l’alcordanza personal, del recuerdu qu’inda bilta nel caletre de quien nos años caberos de la vida echa una güeyada a los momentos importantes del auténticu viaxe de la esistencia. Como si fuera un homenaxe, Xulio Viejo escucha, apunta y dispara la escopeta lliteraria de les pallabres pa, dende lo particular, escribir un entendimientu universal sofitáu no filosófico y no astral. Nun sigue una socesión cronóloxica de los fechos que cuenta, sofita la narración en conceptos que desarrolla tomando como exemplu vital les andancies que conoció en boca d’otros pero que siguen rescamplando nos requexos del paisaxe que tovía ye posible acolumbrar. Asina, hai capítulos (o ensayos, o rellatos) que titula “La lluz” o “La rotación”, de calter más astronómicu. Otros tomen l’encabezamientu con “Apocalipsis” o “Epifaníes” con tastu a lo relixoso y pagano. Y dalgunos formen parte d’un discursu filosóficu y moral, como “El mundu real” o “L’otru mundu”. Pero nun tien qu’engañase’l llector pol títulu del capítulu col que s’alcuentra (acompañáu por una cita, les más de les veces, d’estudiosos griegos y romanos), toos tienen dalgo de toes estes disciplines científiques.

Tamos delantre d’una obra que tien de lleese con posa, seliquino. Que nos va facer saborguiar munches veces la narrativa poética y un estilu académicu nel discursu, empíricu y supersticiosu al empar. Por eso digo lo del ensayu pa con “Onde’l caos se texe y se destexe”, porque nun se nos ta rellatando unos fechos ensin más, de xente trabayador, rural, pola simple circunstancia de parentescu familiar o vecinal. Son fazañes cotidianes que muestren la conexón ente lo real y lo máxico, ente’l pasar de les hores del reló y el pasu verdaderu del tiempu, d’esi ritmu que ye la esperiencia vital tomando como referencia’l marcu paixasísticu que nos arrodia. De la naturaleza y les rellaciones humanes como’l marcapasos de los corazones soterraños, fincaos con fuercia a la llucha y el llabor.

Pémeque esta obra ye un llibru que, puede dicise, ye un trabayu mui personal. Y nun lo digo por mor de los protagonistes, dígolo pola manera na que Xulio Viejo escueye y peñera acontecimientos pa llevalos a otres dómines, a ponelos en consonancia con conductes asemeyaes d’otres cultures más célebres no pedagóxico, con más sonadía nos pupitres de les escueles pero igual de determinantes pa pescanciar lo cercano, pa ponelo a furrular ensin falses convicciones. Pa echar a andar les vivencies personales que caún tien guardaes y faceles sentir importantes na construcción propia de la memoria. Busca consiguir una visión universal dende’l pueblu, una llectura metáforica dende la mortera, una esplicación astracta dende’l mitu, dende la cueva allumante de lo fundacional. Un rellatu diferente, profundu y sensorial dende l’almiración polos seres y los astros que marquen el nuesu camín hasta’l pasamentu. Calidá y estilu lliterariu sobresaliente.

Javi Solís