BASES DEL PREMIU «MUYER» DE NARRACIONES TRABE 2024

Primera: Ediciones Trabe, col oxetivu de favorecer y promover la creación lliteraria n’asturianu d’autoría femenina convoca la primer edición del Premiu «Muyer» de Narraciones Trabe. Podrán optar al premiu «Muyer» toles muyeres interesaes, d’edá adulta, con obres de narrativa escrites n’asturianu, yá sían noveles, recopilaciones de cuentos o cualesquier otra forma posible de narración ficcional. Cada autora pue presentase namás con un orixinal.

Segunda: Les obres han tener una estensión mínima de 70 páxines DIN A4 escrites a doble espaciu per una sola llana y cuerpu de lletra Times New Roman de 12 puntos o apaecío. Han ser inédites y tar ensin premiu n’otros concursos como conxuntu o per separao. Les autores van responder de l’autoría y orixinalidá de la obra presentada.

Tercera: El premiu tien una dotación de 2.000 euros en conceptu de derechos d’autoría y la publicación dientro de la colección Incla d’Ediciones Trabe. El xuráu pue dexalu desiertu según aconseye la calidá de les obres presentaes, pero non partilu.

Cuarta: El plazu de presentación d’orixinales va abrise a les 00:00 h del 15 d’abril del 2024 y pesllase a les 23:59 h del 31 d’agostu del mesmu añu.

Quinta: La presentación d’orixinales puede ser de dos maneres:
1) Per internet, al corréu electrónicu muyer@trabe.org. Nel «asuntu» han poner «Premiu “Muyer” de Narraciones Trabe 2024». Nel cuerpu del mensaxe tien d’apaecer el títulu de la obra y l’alcuñu de l’autora. Amás, ha de dir axuntáu un documentu pdf cola obra y otru documentu, tamién pdf, colos datos personales: nome, apellíos, teléfonu y dirección de corréu electrónicu. Si se fai l’unviu d’esta manera hai que lo facer dende una dirección de corréu electrónicu que nun sía reconocible pa la persona receptora.
2) Per corréu postal. Han remitise dos sobres nos qu’ha apaecer «Premiu “Muyer” de Narraciones Trabe» a esta dirección: Ediciones Trabe C/ Fernando Alonso, 17 – Baxu, 33009 d’Uviéu. En caún de los sobres ha apaecer, amás, el títulu de la obra y l’alcuñu de l’autora. Ún de los sobres ha contener: datos personales (nome, apellíos, teléfonu y corréu electrónicu) y l’otru va llevar l’orixinal de la obra y dos copies. Si s’opta por esta modalidá, hai que presentar tolos documentos en sobre abiertu pa que’l personal de Correos feche y selle.

Sexta: El xuráu va tar formáu por persones rellacionaes col ámbitu de la lliteratura, amás de dos en representación d’Ediciones Trabe actuando como una como presidenta (con voz y votu) y otra secretaria (con voz pero ensin votu).

Sétima: Al fallu del xuráu nun se pue retrucar. Va facese públicu primero del 5 d’avientu del 2024.

Octava: Les obres que nun se premien van devolvese a les autores, en pidiéndoles estes, nos tres meses siguientes a que se dea conocencia del fallu. Desque pase esti plazu ensin que naide les reclame van ser destruyíes.

Novena: Presentase al premiu supón tar d’alcuerdu coles bases. Les cuestiones que se planteguen y que nun tuvieren establecíes nestes bases va poder resolveles el xuráu.