|
|
|
|
|
|
|
Cai Padre Buenaventura de Paredes, 4 33001 Uviéu - Asturies - España Teléfonu y Fax: ++34 985 208 206 trabe@asturies.org |
| Ediciones Trabe ye una empresa privada, fundada n'Uviéu en 1992, que se dedica esencialmente a la edición y comercialización de llibros n'asturianu. Tien abiertes colecciones de narrativa, poesía, ensayu, investigación, cómic, arte, diccionarios, lliteratura infantil y xuvenil, didáctica, humor, etc., tanto orixinales escritos n'asturianu como traducciones dende les principales llingües de cultura.
Nel añu 2001, dientro d'una política permanente de crecimientu y d'atención al llector, Ediciones Trabe pon n'Uviéu la so primer Llibrería Asturiana, agora abierta na cai Padre Buenaventura de Paredes, 4 (33001 Uviéu) dedicada a la exposición y venta de llibros asturianos y a los llibros infantiles. Cuenta con un espaciu p'actividaes culturales y sala d'esposiciones. Esta iniciativa complétase con esta llibrería virtual, que facilita información y venta a cualquier puntu del mundu. Dende l'entamu Trabe vien emprestando especial interés pola edición d'autores mozos, dando salida a les primeres obres de gran parte d'ellos. Cuenta con un ampliu repertoriu de llibros de los autores actuales más destacaos de la lliteratura asturiana, munchos de los cualos foron perfaciendo la so obra al empar qu'Ediciones Trabe la diba asoleyando. Per otru llau ocúpase de rescatar la lliteratura de los escritores d'époques pasaes n'ediciones curiaes y riguroses, qu'en munches ocasiones acerquen al llector de güei una obra perestimable que nel so momentu pasó inalvertida. Tamién busca presentar n'asturianu obres esenciales de la lliteratura universal en peracabaes traducciones, de les que se responsabilicen escritores esperimentaos que traducen siempre dende la llingua orixinal. Trabe ye una editorial abierta, a la que-y presta recibir y comentar orixinales, suxerencies, idees... dientro d’un compromisu constante pa cola llingua y la lliteratura n’asturianu. Cada llibru que llega a esta Editorial lleémoslu con atención, anotando toes aquelles coses que merecen esclariase colos escritores. Enantes de la so publicación, amás de la corrección o correcciones que-y da l’autor o autora, la propia Editorial fai dos correcciones de pruebes pela so cuenta. El trabayu continuáu, el serviciu d’información de novedaes a llibreríes y a clientes, l’esquisitu precuru que se pon nel diseñu y nel acabáu de los llibros, y el tratu profesional de liquidación de drechos d’autor, pagu de drechos de traducción, traductores, dibuxos, fotografíes, etc., fai qu’esta empresa se convierta nuna referencia permanente nel panorama editorial asturianu. Ye miembru del Gremiu d’Editores d’Asturies. Ente 1992 y 1994 convocó los premios «Trabe de Narrativa» y «Montesín de Lliteratura Infantil y Xuvenil». Ta publicando regularmente los premios de Poesía «Teodoro Cuesta» que convoca l’Ayuntamientu de Mieres y, con menor regularidá, el «Fernán-Coronas» de la Sociedá La Regalina de Cadavéu, l’«Elvira Castañón» del Ayuntamientu d’Ayer y el «Vital Aza» del Ayuntamientu de Llena. En 1995 Ediciones Trabe recibió l’«Urogallu de Bronce» pola defensa del asturianu que concede’l Centru Asturianu de Madrid y, mientres se convocó, ente 1996 y 1999, foi galardonada col Segundu Premiu d’Edición n’Asturianu «Antonio García Oliveros». |
|
|
