Comentariu editorial

Les culuebres son, xunto col llobu, ún de los animales más desprestixaos ya condergaos inxustamente pola xente. Esti camientu val-y a Alberto Álvarez Peña pa entamar un profundu y mui prestosu estudiu sobre estos animales del diablu, identificaos coles muyeres impures, la mentira, l’engañu y el paganismu en cuantes que’l cristianismu contaminó la figura de la sierpe.

Capítulu a capítulu, l’autor fai un percorríu peles estremaes lleendes y cuentos de culiebres pa dir desentrellizando lo real de lo imaxinario, lo cierto de lo incierto, buscando l’orixe y los porqués d’eses creencies, así como los remedios que la sabiduría popular supo poner contra’l velenu o los esconxuros contra los poderes maléficos del cuélebre y demás sierpes. Fai tamién un repás de la presencia de la culiebra na arquitectura tradicional asturiana, tanto relixosa como civil, ensin escaecer la importancia d’esti animal y de la so variante mitolóxica, el cuélebre, na lliteratura de tradición oral. Les guapes ilustraciones del mesmu Alberto faciliten y animen la llectura d’una obra yá de por sí mesma atractiva.

Alberto Álbarez Peña (Xixón, 1966), conocíu estudiosu de la cultura y la mitoloxía asturiana, ye miembru del Conceyu d’Estudios Etnográficos Belenos, escritor y dibuxante, tamién creador de cómic amás de cartelista, ilustró delles obres publicaes nesta mesma editorial: Ello yera una vez..., de Fernando de la Puente, y Fontenebrosa, de Vicente García Oliva. Tien, tamién, publicáu, ente otros munchos, un magníficu llibru de mitoloxía asturiana, tituláu Asturias mágica.