Comentariu editorial

Contra la idea de pluralidá cultural asturiana comúnmente aceptada y difundida polos estudiosos asturianos (los munchos bables, les munches tribes de cultura popular, les munches Asturies...), l'autor d'esti llibru analiza y concluye, con bayura de datos, la so fonda unidá: nun hai más qu'una Asturies, hai una Llingua Asturiana y hai una Cultura. Por supuesto, como en toles llingües y cultures, puen estremase variedaes, perriba de les cuales manifiéstase claramente esa unidá. A lo llargo de la so esposición Sánchez Vicente esplica les causes históriques y sociolóxiques que llevaron a entender Asturies como pluralidá d'entes estremaos, ente les que destaquen la desconocencia que'l pueblu asturianu tien de la so cultura propia y la falta d'un discursu históricu que ponga de manifiesto esa xuntura. Xuan Xosé Sánchez Vicente, Presidente del Partíu Asturianista, nació en Xixón en 1949. Foi ún de los fundadores de l'Asociación Conceyu Bable (1974), a partir de la cual s'entamen la recuperación de la nueva identidá cultural asturiana, y el desendolcu del asturianu como llingua vehicular d'esa cultura. Esti llibru ye una edición corrixida de la primer parte de La cultura popular asturiana: unidá y pluralidá, del mesmu autor, publicáu en 1985 y güei inatopable nes llibreríes.