Comentariu editorial

L’aportación de Xuan Xosé Sánchez Vicente (Xixón, 1949) a la lliteratura asturiana ye fundamental igual no tocante a la parte creativa qu’a la crítica o investigadora. D’un llau ye una de les voces poétiques esenciales del Surdimientu –como lo demuestren los llibros publicaos: Camín de señardaes (1980), Poemes de Xixón (1981), De reidores costes (1988), ...Y de llastientes picos (1999), As de corazon/es/y/es (2001)–. Nesti mesmu terrén creativu tien publicaos dos llibros de cuentos –Cuentos de llingua afilada (1984) y Lluna llena (1990)–, una novela –La muerte amiya de nueche (1984)– y la recopilación del so teatru completu –Esa danza ye la vuestra, si ye que vos presta (1992)–. Un bon resume de toa esta actividá creativa ye’l llibru Antoloxía lliteraria, publicáu nel 2001.

Menos conocida, por tar esperdigada per re-vistes o periódicos, o n’ediciones yá rares, ye la so contribución a la conocencia de la nuesa historia lliteraria, de la que destaquen dos llibros, Esvilla de poesíes na llingua asturiana (1979, reedición de la clásica antoloxía de Caveda), y el llibru publicáu en 1991 Crónica del Surdimientu (1975-1990), una detallada historia crítica de la nuesa reciente lliteratura que fixó’l nome de «surdimientu» pa esta brillante etapa de finales del sieglu xx.

Esti llibru, Litora cantabrica, permite acolumbrar la importancia d’esti llabor teóricu de Sánchez Vicente al dexar recoyíos los estudios lliterarios que l’autor foi publicando a lo llargo de les tres últimes décades, con particular atención a los nuestros clásicos. Complétase con varios y mui oportunos estudios de sociollingüística asturiana, y con otros trabayos sobre filoloxía y sintaxis de la llingua asturiana.

En breve va asoleyar tamién un importante y llargu ensayu sobre’l primeru de los poetes asturianos: Les producciones clasicistes d’Antón de Marirreguera: un ensayu de métodos creativos, estética lliteraria y ideoloxía del discursu críticu sobre la nuestra lliteratura (2004) y nel 2005 un nuevu diccionariu que sumar al Diccionariu castellanu-asturianu publicáu en 1996, nesti casu un completu Diccionariu asturianu-castellanu.