Cuentos de ser y de tar

Conozo a Laura Marcos d’hai lo menos diez o más años, de la qu’ella yera malapenes una mocina nueva qu’estudiaba Filoloxía Inglesa na Facultá del Milán. Llegó a Ediciones Trabe a facer les práctiques correspondientes a los estudios d’esperta en Llingua Asturiana.

Decatéme daquella de que, pesie a ser mui mui moza, remanaba muncho bien l’asturianu y en pocu tiempu foi a facese coles regles cuasi universales de la corrección editorial.

Pasó’l tiempu y ella acabó la carrera y yo siguí echando les hores y los díes en Trabe, empresa na que se producieron munchos cambios, vueltes y revueltes y na qu’ella nos echaba de cuando en vez una mano profesional nos asuntos de la corrección.

Perdí-y la pista una temporada grande y, andando’l tiempu, vila publicar dalgún poema na revista Reciella Malory, dalgún cuentu y un microrrellatu en Formientu y, más tarde, traducciones muncho guapes na revista de cultura Campo de los Patos y enteréme que formaba parte de la Timba Poétika xunta Pablo X. Suárez ente otra más xente.

Un día volví vela y otru pasó per Trabe y dexónos un garapiellín de cuentos y dalgún poema. Si éstos quedaben más lloñe de la mio sensibilidá poética (la educación sentimental de la mio xeneración foi abondo distinta en referentes culturales), la so narrativa, sollerte al detalle más piquiñín de la vida de les persones, de les formes de les coses que signifiquen y definen al ser humanu, cautivóme. Una manera de contar tan cuidada, que llega a les coraes mesmo que’l cuchiellu taraza la mantega: ensin ruíu, en silenciu, pero fondo.

Y ella siguió escribiendo y ganando premios equí, ellí y más p’alló y a lo ultimo tuvo una cantidá de cuentos que podíen formar un llibru bien curiosu y pernecesariu pa desapolinar y remover l’agua estancao de la lliteratura asturiana que paecía amorecer, ella tamién, ensin ruíu y en silenciu.

Nun voi negalo, tengo una zuna que dalguna xenta diz que ye permala y otra xente calla la boca y vuelve’l focicu: ensin decatame echo sobre cuasi tolos fechos d’esta vida una mirada de xéneru y cuasique nunca nun me presta lo que veo. Taba yo un daqué esmolecida porque nun alcontraba, más p’allá de Vanessa Gutiérrez, nes xeneraciones más voces, una muyer qu’apuntara maneres y tuviera voluntá de facer lliteratura de la de verdá; y topéla en Laura Marcos (Mieres del Camín, 1982), a quien nun-y falta ilusión, porgüeyu, conocimientu y base cultural pa ser a ello. Bien ye verdá qu’al poco, o cuasi al mesmu tiempu, descubrí otres moces nueves que tán faciendo lliteratura de la bona y que tienen, si nun se malogren, un futuru enteru, porque’l mundu ye anchu, pero nun tien por qué ser ayenu; pue ser d’elles: Solinca Turbón, Raquel F. Menéndez, Alejandra Sirvent, Sofía Castañón, María García…

Asina que pasín a pasu foi xurdiendo esti volume de cuentos de Laura Marcos: Cuentos de ser y de tar. Diez son los testos que lu conformen, agrupaos de cinco en cinco en dos partes baxo los epígrafes «Persona – tiempu» y «Aspectu– mou». Como diz l’autora nel prólogu, «el ser aplícase a característiques propies del individuu y el tar a circunstancies sobreveníes a ésti»; y como bona filóloga, la profesión tiró-y a la de dar títulu a los distintos epígrafes y d’esa manera xurden «Persona – tiempu» y «Aspectu– mou», que nun ye más otro que volver a la esencia humana y a la base primixenia de la sicoloxía: ¿Quién somos? ¿Cómo tamos?

Quien llea estes llinies yá se tendrá decatao de qu’esta obra tien una estructura formal muncho trabayada na que nada queda al debalu: vese nestos escritos el posu de quien yá trió’l camín de la lliteratura, de la bona lliteratura: cuentos calmos que nos maten callandino y ensin aspavientos, que nos dexen un regustu de tristura, l’asomu d’un mundu que paez perfechu y llimpiu na superficie, pero que no fondero d’él añeren l’odiu y l’abusu, la derrota, el doliosu saber que’l tiempu nun torna, que yá nunca nun vamos ser lo qu’un día suañemos, que la vida y la muerte enrédense nuna rede difícil de desentrellizar, qu’hai persones que nun son a ser otro que lo que son: fieres xabaces con formatu humanu.

Porque naide como Laura Marcos pa texer y enduviellar hestories cotidianes que son, con cenciellez y realismu, a enseñanos los emprunos caminos de la vida, les difíciles rellaciones del ser humanu con sigo mesmu, cola naturaleza y colos sos iguales. Con precisión de reló suizu, l’autora va construyendo una obra narrativa non por nueva inmadura, yá que tien oficiu, personalidá y hestories pa contar y sabe muncho bien cómo contales.

Antologada en La prueba del once. Poesía asturiana del sieglu XXI (2015), Cuentos de ser y de tar ye la so primer obra publicada, pero nella amuesa yá maneres de narradora  madura y con futuru.

Esther Prieto